İlahi, Azərbaycanı kimlər idarə edir!?

Müasir dünyada diktaturanın hökm sürdüyü ölkələr hələ ki çoxdur. Təbiidir ki, bu ölkələri diktator təkbaşına idarə etmir, irili xırdalı dövlət vəzifələrində müxtəlif insanlar çalışır. Elə diktatorlar var ki, ölkədəki ən qabiliyyətli adamları öz komandasına toplayıb nümunəvi hökumət təşkil edir, bununla da müxalif qüvvələrin ən böyük silahını – müvəffəqiyyətli idarəçilik müddəasını onların əlindən almış olur. Belə diktaturalara Kənan Evren dövrü Türkiyəsini, Pinoçet dövrü Çilisini, Pərviz Müşərrəf iqtidarını, Malayziyada, Bruneydə mövcud olan siyasi sistemi nümunə göstərmək olar.

Azərbaycanda da 14 ildir ki, diktatura rejimi mövcuddur. Heydər Əliyev dövlət başçısı olduğu zaman özünün kifayət qədər dərin bilik və qabiliyyətindən yararlanaraq az-çox funksional bir komanda yaratmışdı və bir sıra vəzifələrə həqiqətən professional insanları yerləşdirmişdi. Düzdür, bu insanların böyük əksəriyyəti çox çəkmədən diktatorun əməllərinin məsuliyyətini daşımamaq üçün komandadan uzaqlaşdılar.

Hakimiyyət estafeti oğul Əliyevə ötürüldükdən sonra gənc diktator atasının miras qoyduğu komandanı qoruyub-saxlamaqla iqtidarına professionallıq görüntüsü verməyə çalışdı. Və əsas fiqurlar bu günə qədər də postlarındadırlar. Amma gec-tez KQB generalı ilə fərarinin fərqi üzə çıxmalıdır...

Bu gün Azərbaycan Respublikasının dövlət orqanlarında kimlər çalışır? Bu adamların bilik və bacarığı nə dərəcədədir? Bunların səviyyəsini bu gün uçan binalar, partlayan, yanan obyektlər, məhv eilən tarixi abidələrimiz bütün çılpaqlığı ilə göstərir.

Ayna qəzetinin 4 sentyabr tarixli sayında çap olunmuş “Təxribatın yeni hədəfiİ” adlı məqalədə oxuyuram:

 “Məsələyə münasibət bildirən Azərbaycan Xarici İşlər Nazirliyi mətbuat xidmətinin rəhbəri Xəzər İbrahim isə avarlar adından səslənmiş bəyanatı təxribat adlandırıb: "Ermənistan özlərini elm adamı adlandıran müxtəlif şəxslərin vasitəsilə Azərbaycana növbəti ərazi iddiaları irəli sürməyə çalışır. Beynəlxalq ictimaiyyət və region ölkələri bunu nəzərə almalıdır. Mən ümid etmək istərdim ki, Ermənistan tərəfi Qafqaz Albaniyasının tarixini öyrənəndən sonra bu günə kimi irəli sürdüyü bütün iddiaların boş bir şey olduğunu dərk edəcək".”

Xəzər İbrahim

Nəzərinizə çatdırım ki, söhbət bu günlərdə Yerevanda keçirilən və Qafqaz Albaniyasının tarixinin öyrənilməsinə həsr olunmuş beynəlxalq simpoziumdan gedir. Vəzifəsinə “test üsulu” ilə haqq qazanan (Xarici İşlər nazirliyi işçiləri test üsulu ilə seçdiyini iddia edir) Xəzər bəy Simpoziuma yığışmış bu qədər görkəmli alimin alimliyini şübhə altına alır. Sonra da ümid edir ki, Ermənistan tərəfi Qafqaz Albaniyasının tarixini öyrənəndən sonra... Nə qədər sadəlöhv və savadsiz olmaq lazımdır ki, Ermənistan tərəfinin Qafqaz Albaniyasının tarixini bilmədiyini və öyrənəndən sonra öz iddialarından əl çəkəcəyini söyləyəsən? İlahi, Azərbaycanı kimlər idarə edir!? Bu insanın görəsən heç tarixdən və tarixşünaslıqdan səthi də olsa xəbəri varmı? Xəbəri olsaydı bilərdi ki, ermənilər 1000 ilə yaxındır ki, Qafqaz Albaniyasının tarixini öyrənir və saxtalaşdırırlar. Qafqaz Albaniyasının tarixi üzrə ən sanballı və o qədər də riyakar olan əsərlər məhz erməni tarixçiləri tərəfindən yazılmışdır. Qafqaz Albaniyasının tarixinə aid olan və ermənilərə sərf edən ən qiymətli arxiv sənədləri Matanadaranda saxlanılır. Sərf etməyən sənədlər isə çoxdan erməni tarixçiləri tərəfindən öyrənilib və məhv edilib. Və bu məhvetmə prosesi bu gün də Qarabağda davam edir.

Qayıdaq Simpoziuma. Simpoziumun adı elmi olsa da mahiyyəti siyasidir. Ora yığışan alimlər də hara, nə üçün gəldiklərini yaxşı bilirlər. Sadəcə, onlar bizim bir-çox alimimizdən fərqli olaraq həm də vətənpərvərdirlər. Bəziləri isə daha çox vətənpərvərdirlər, nəinki alim. Və hamısı türk düşmənidirlər. Bu şərtləri nəzərə alaraq, anlamaq lazımdır ki, ermənilərin bütün əməlləri kimi bu da təxribatdır və Qarabağın işğalını elmi surətdə əsaslandırmağa yönəlmişdir. Bu gedişlə onlar Qarabağın əzəldən erməninin ana vətəni olduğuna bütün dünyanı inandıracaqlar. Və bu işdə onlara görkəmli sənətkarımız, Azərbaycanın Rusiyadakı səfiri, əslən Qarabağlı olan Polad Bülbüloğlu da yaxından kömək edəcək. “Ermənilər həmişə burda yaşamışdır, bundan sonra da yaşayacaqlar” sözləri məhz P. Bülbüloğluna məxsusdur. Tarixdən orta məktəb səviyyəsində xəbərdar olan adam Qarabağı nəzərdə tutaraq bu sözləri deyərdimi? Yoxsa Polad müəllim elə bilir ki, bəşəriyyətin 150 il tarixi var?

Azərbaycan tərəfi Xəzər bəy, P. Bülbüloğlu kimi diplomatları, Ramiz Mehdiyev kimi akademikləri ilə erməni ekspansiyasının qarşısını almağa nə maraqlıdır, nə qadirdir. Atalarımızın qızıl kimi sözü var, deyir – “donuza çıx! deməklə donuz bostandan çıxmaz”. Donuzun qulağından tutub çıxarmaq lazımdır. Bu vəzifə isə bizim, azərbaycanın milli-demokratik qüvvələrinin üzərinə düşür. Bir gün bu işi görəcəyimizə heç kimin şübhəsi olmasın.

Mübariz S. Əzimli