Ermənistanda hakim koalisiyada təmsil olunan “Daşnaksütun” partiyası Moskvada Dağlıq Qarabağ münaqişəsinə dair danışıqların başladığı bir vaxtda Azərbaycana qarşı təcavüzkar və həyasız bəyanatla çıxış edib. “Armenia Today” saytının xəbərinə görə, bu partiyadan deputat, parlamentin vitse-spikeri Qrayr Karapetyan “Daşnaksütun” partiyasının Dağlıq Qarabağ münaqişəsinin həllində tutduğu mövqeyi açıqlayıb.
Karapetyan deyib ki, Ermənistan nəinki Dağlıq Qarabağı, hətta onun ətrafındakı 7 rayonu da Azərbaycana qaytara bilməz. O, Azərbaycanın müharibəyə başlayacağı halda “bütün ərazisini itirə biləcəyini” də deyib. “Nəyə görə siz elə hesab edirsiniz ki, hərbi əməliyyatların başlaya biləcəyindən Azərbaycan narahat deyil. Əgər sabah Azərbaycan müharibəyə başlasa, Ermənistan hərbi əməliyyatları onun ərazilərinin içərilərinə keçirərək şimal qonşusu Rusiya ilə quru və dəniz sərhədlərini təmin edəcək” deyə daşnakların nümayəndəsi bildirib. Karapetyan deyib ki, münaqişənin həlli Dağlıq Qarabağın statusunu və təhlükəsizliyini təmin etmədən mümkün deyil, hətta erməni tərəfindən kimsə “kefinin yaxşı olmayan vaxtında” hansısa sənədi imzalasa belə. Onun sözlərinə görə, Ermənistan hakimiyyətinin Qarabağ məsələsində tutduğu indiki mövqe daşnakların mövqeyinə zidd deyil.
Qeyd edək ki, Moskva danışıqları ərəfəsində Dağlıq Qarabağdakı erməni qüvvələri Azərbaycanın yeni ərazilərini tutmaq variantları əsasında hərbi təlimlər keçiriblər. İndi isə Ermənistan hakimiyyətinin təmsilçisi “Dənizdən dənizə böyük Ermənistan” ideyasından çıxış edərək hərbi əməliyyatların başlayacağı halda bütün Azərbaycanı, o cümlədən Bakını tutmaqla və Xəzər dənizinə çıxış əldə edərək Rusiya ilə dəniz sərhədlərini təmin etməklə hədələyir.
Siyasət şöbəsi