Dünən xaricdə yaşayan həmvətənlərimiz də prezident seçkilərində iştirak etdilər. Əgər buna iştirak demək olarsa... Söhbət ondan gedir ki, MSK iki milyona yaxın Azərbaycan vətəndaşının çalışdığı Rusiya Federasiyası da daxil olmaqla, 32 ölkədəki səfirliklərimizə cəmi 10 min bülleten göndərib.
“Təkcə Moskva şəhərində 700 minə yaxın azərbaycanlı yaşayır. Bizdə olan məlumata görə, Azərbaycanın Rusiyadakı səfirliyində cəmi 7 min adamın səs verməsinə imkan var. Yəni Moskvaya bu qədər bülleten göndərilib. Bu isə o deməkdir ki, yüz nəfərə bir bülleten düşür”.
Bu barədə dünən əməkdaşımıza Moskvadakı mənbəmiz xəbər verir. Mənbənin dediyinə görə, o, dünən yerli vaxtla saat 12 radələrində Moskvadakı səfirliyimizin ətrafında müşahidə aparıb. “Bir saat ərzində tək-tük şəxslərin səfirliyin binasına daxil olduğunun şahidi oldum”, deyə mənbə bildirib.
İndilikdə isə bizi bir məsələ maraqlandırır. Görəsən, Rusiyada çalışan iki milyon Azərbaycan insanının yerinə Azərbaycanda kim və necə səs verib?
SƏBUHİ