Bir neçə gün əvvəl Ağır Cinayətlərə Dair İşlər üzrə Hərbi Məhkəmədə Cinayət Məcəlləsinin 274-cü (dövlətə xəyanət), 338.1-ci (Azərbaycan Respublikasına qəfil hücumun vaxtında aşkara çıxarılması və dəf olunması üzrə, yaxud onun təhlükəsizliyinin təmin edilməsi üzrə döyüş növbəsi (döyüş xidməti) çəkmə qaydalarını pozma), 228-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 150-ci (seksual xarakterli zorakılıq hərəkətləri), 331-ci (hərbi qulluqçunu təhqir etmə, döymə və ya işgəncə vermə) maddələri ilə təqsirləndirilən 6 hərbçinin işi üzrə məhkəmə prosesi başa çatıb.
Məhkəmənin hökmü ilə təqsirləndirilənlər - Ağdam rayonunda yerləşən “N” saylı hərbi hissənin çavuşu Amid Vəliyev 14, Tahir Bağırov (ad, soyad dəyişdirilib-C.C)11, Samir Məmmədov isə 3 il müddətinə azadlıqdan məhrum olunublar. Digər 3 hərbçi -  Elnur Kərimov, Ehtiram Tağıyev və İmran Pirəliyev isə yalnız CM-nin 333-cü (Hərbi hissəni və ya xidmət yerini özbaşına tərk etmə) maddəsi ilə təqsirli bilinərək 1 il şərti olaraq azadlıqdan məhrum ediliblər. İttihama görə, çavuş Amid Vəliyev əsgər Tahir Bağırovu düşmən tərəfə keçirərək onu gizli əməkdaşlığa cəlb edib.
Məhkəmə iclasında təqsirləndirilən şəxs qismində ifadə verən əsgər T.Bağırov qeyd edib ki, “N” saylı hərbi hissənin zenit-pulemyot manqasında xidmət edərkən manqa komandiri Amid Vəliyev 2007-ci ilin noyabrında bir neçə dəfə onu müxtəlif bəhanələrlə xidmət etdiyi döyüş postunun ərazisində döyüb.
Bundan sonra manqa komandiri onu düşmən tərəfə keçirərək dövlət sirrini xarici dövlətin nümayəndəsinə verməyə cəlb edib: “İlk dəfə 2007-ci ilin noyabr ayının təxminən 8-9-da gecəyarısı düşmənlə üzbəüz yerləşən 1 saylı postda döyüş növbəsi çəkən zaman ora düşmən hərbçisi gələrək Amidlə görüşdü. Bundan sonra isə Amid məndən silahı postda qoyaraq onunla düşmən tərəfə keçməyi tələb etdi. Özü isə silahını götürərək məni də özü ilə düşmən hərbçiləri ilə görüşməyə apardı. Hər dəfə o, düşmən hərbi qulluqçularına dövlət sirri sayılan məlumatları, o cümlədən döyüş postlarının sayı və adları, hərbi texnika, silah-sursat, hərbi qulluqçuların silahlandığı silahlar, bölüyün, taborun və hərbi hissənin qulluqçularının, komandirlərinin adı, soyadı, atasının adı, səngərlərin qazılması və ayrı-ayrı postların irəli çəkilməsi barədə məlumatları ötürürdü. İlk dəfə Amid məni ora aparanda düşmən hərbçisi tərəfindən zorlandım. Bundan sonra isə Azərbaycanın dövlət bayrağını yerə atıb, Amidlə məni bayrağın üstünə çıxmağa məcbur etdilər. Həm zorlama, həm də bayrağın tapdalanması düşmən hərbçiləri tərəfindən videokamera ilə çəkildi. Bizə tanış gəlməyən əlifbada yazılmış kağıza qol çəkdirdilər”.
T.Bağırov ifadəsində onu da qeyd edib ki, 2007-ci ilin noyabr ayında A.Vəliyev ona cinsi əlaqədə olmağı təklif edib. Əks təqdirdə onu düşmən hərbçisi tərəfindən zorlanması barədə rüsvayçı məlumat yayacağı və düşmən hərbçiləri tərəfindən öldürtdürəcəyi ilə hədələyib. Bundan sonra A.Vəliyev T.Bağırovu 1 saylı döyüş postunun ərazisində yerləşən tualetdə zorlayıb.
Məhkəmədə şahid qismində ifadə verən Rəhim Məcidov qeyd edib ki, tibb məntəqəsində müalicə olunduğu müddətdə məntəqənin ərazisində A.Vəliyevin T.Bağırovu sonuncunun onu düşmən tərəfə keçirib düşmənə hərbi sirr vermələri, Azərbaycanın dövlət bayrağını tapdalatdırmaları və düşmən hərbçisi tərəfindən zorlanması barədə bir-biri ilə mübahisə etdiklərinin şahidi olub. Eyni zamanda həmin mübahisə zəminində A.Vəliyev T.Bağırovu hədələyərək boğazından tutub boğub.
Bundan sonra tibb məntəqəsində R.Məcidov A.Vəliyevdən həmin məlumatların doğru olub-olmadığını soruşduqda, o, bunu təsdiq edib. Bildirib ki, silah oğurlamaq məqsədilə bir neçə dəfə düşmən tərəfə keçməyə cəhd göstərib.
Bu məlumatları eşitdikdən sonra R.Məcidov başa düşüb ki, A.Vəliyev Ermənistan Respublikasının Silahlı Qüvvələrinin əməkdaşları tərəfindən məxfi əməkdaşlığa cəlb edilib və bu barədə hərbi hissə rəhbərliyinə məlumat verib. Bununla da MTN-in Hərbi Əks Kəşfiyyat İdarəsinin əməkdaşları Amid Vəliyevi və sonradan digər hərbçiləri yaxalayıblar.
Cavad CAHANGİRLİ