Mübariz S. Əzimli

Hələ doğma vətənimdə yaşadığım zaman əlim dinc durmadı, götürdüm qələmi bir yazı yazdım və bu yazı "Bakı Xəbər" qəzetinin 9 oktyabr, 2003, N 036 sayında Ur Al (ortancıl oğlumun adıdır) imzası ilə çap olundu. Yazının adı "Azadlıq adası", leytmotivi "Yaşasın monarxiya" idi. Yazının qələmə alındığı günü deyə bilmərəm, amma çap olunduğu gündən düz 5 il 4 ay keçir...

O vaxt o yazını yazanda heç ağlıma da gəlməzdi ki, bir gün gələcək, uzaq İsveçdə oturub, bu yazıda irəli sürdüyüm təkliflərin qəbul olunduğunu eşidəcəyəm. Özü də ən yüksək səviyyədə! Gec də olsa, güc oldu!

Sözümün qəmbərqulusunu anlatmaq üçün bu yazını diqqətinizə çatdırıram:

"- Hə, nə olsun", deyə sual verməmək üçün bu xəbəri də oxumaq lazımdır:

«Yeddi zirvə» layihəsinin baş planının dizaynını Bjarke İngels Group (BİG) verib

Xəzərdə, Nargin adasında ekoloji təmiz yeni istirahət və əyləncə şəhərciyi tikəcəklər.

Layihənin sahibi yerli Aurositi Holding şirkətidir. Şirkətin icraçı direktoru Oğuz Okan «Azadlıq» Radiosuna deyib ki, layihənin dəyəri 6 milyard dollardır. Okan deyir ki, bu özəl layihədir və büdcə vəsaiti tikilməyəcək, ayrı-ayrı investorlara təklif ediləcək. Oğuz Okan deyib ki, tikinti işlərinin nə vaxt başlanacağı hələ məlum deyil.

Layihənin baş planının dizayneri Bjarke İngels Group (BİG) press-reliz yayıb ki, adada ancaq günəş, külək və su enerjisindən istifadə olunacaq. Gözlənilir ki, burada ənənəvi enerjinin ekoloji təsiri «sıfır» olacaq.

Mədəniyyət və turizm naziri Əbülfəz Qarayev «Azadlıq» Radiosuna deyib ki, bu layihədən xəbəri yoxdur, büdcə vəsaiti hesabına bu tipli layihənin həyata keçirilməsi nəzərdə tutulmur: «Amma biz Nargin adasında turizmin inkişafını nəzərdə tuturuq».

BİG yazır ki, adanın ərazisi 1 kv km.-dir, istirahət şəhərciyini bütün ərazidə tikəcəklər. Layihə ideyası Azərbaycanın səmadan da görünən yeddi dağ zirvəsindən alıb.

Beləliklə, adada Azərbaycandakı yeddi dağ zirvəsini təmsil edən komplekslər tikiləcək.

Layihənin dizayneri Bjarke İngels Group press-relizində yazır ki, Yaxın Şərqdəki bəzi ekstravaqant layihələrdən fərqli olaraq, bu layihədə ərazinin iqliminə xüsusi diqqət ayrılır, bu da ona ümid verir ki, layihə gələcəkdə başqa ekoloji cəhətdən təmiz layihələr üçün zəmin yaradacaq."

Gördüyünüz kimi, prezident 5 il 4 ay bundan öncə verdiyim təklifləri tam və qəti şəkildə qəbul etmişdir, və bu istiqamətdə artıq əməli addımlar atılır. İnşallah, layihə həyata keçirilməyə başladıqda respublikada nə qədər YAP-çı, GAP-çı, GOP-çu var yığıb göndərəcəyik adaya. Bəlkə bu yolla onlardan xilas olduq. Çox çəkməz ki, Azadlıq adası dünyanın mərkəzinə çevrilər. Las Veqas bizim igidlərin qarşısında durum gətirməz. Necə deyərlər, çörəyi ver çörəkçiyə, üstündən də birin! Amerikada bir söz var, deyirlər, Amerika ona görə hamıdan irəlidədir ki, orada hər adama bacardığı işi tapşırırlar. Biz də deyəsən yavaş-yavaş amerikalaşırıq.

Stokholm,

03.02.2009